Arquivo do blog

BEBESCENA: AZUL non é só unha cor

Azul é teatro, azul é música, azul é maxia, azul é imaxinación, azul é movemento, azul é linguaxe… Voilá! AZUL é outra forma de estimulación temperá creativa, motivadora e diferente”

Así é como define Teloncillo, compañía teatral encargada de clausurar o programa BEBESCENA deste 2015, a obra que se representará o próximo domingo 13 de decembro no auditorio do Centro Ágora.

Dossier da produción “Azul” de Teloncillo Teatro

Considerando as habilidades cognitivas e psicomotrices dos bebés, Ana Gallego e Ángel Sánchez, integrantes da premiada compañía, adaptaron esceas, poemas, cancións e inventaron xogos coa fin de crear unha representación músico-teatral pensada por e para os nenos e nenas de 1 a 3 anos.

A presenza da maxia, das sorpresas e do ritmo en directo amosarán aos pequenos/as novas formas de aprendizaxe, convertendo o espectáculo nunha experiencia multisensorial única e enriquecedora.

Que vos parece se pintamos o noso mundo de cor AZUL?

Convidámosvos a desfrutar da obra e despedir esta achega “miúda” ás Artes Escénicas (mais só ata o 2016)! BO NADAL!

Advertisements

Medrando entre contos!

Hai xa oito meses que puxemos en marcha as sesións de promoción lectora dirixidas ao público miúdo: os BbEncontros!

Espazo Bebeteca ÁgoraAta entón, máis dun centenar de bebés entre os 4 e 24 meses, acompañados das súas respectivas familias, tiveron a oportunidade de coñecer o noso espazo, quitar os zapatos e tirarse no tapete de cores para viaxar, como se dunha alfombra máxica se tratara, polo marabilloso mundo dos contos e da lectura; un mundo máxico para o que seleccionamos contos sen páxinas, contos corporais, poesías, arrolos e música variada cun obxectivo claro: vincular aos bebés e familias á lectura utilizando a súa imaxinación.

Ao longo deste curso 2013/14 deseñamos un total de dezaseis BbEncontros, baseados nunha metodoloxía creativa e participativa e executados nun espazo cálido e afectivo: a nosa Bebeteca.

Empregamos a narración oral e a lectura de imaxes para descubrir o universo diario dos máis pequenos, homenaxeamos á literatura tradicional e á tradición oral galega a través da música, gozamos da estimulación visual fusionando cores, luces e sombras e destacamos as obras máis recoñecidas de grandes autores/as e ilustradores/as da Literatura Infantil.

Xogamos co movemento, cos xestos e coas palabras, e entre conto e conto puidemos amosarvos recursos, materiais e bibliografías específicas para achegar os libros aos máis pequenos da casa. Pero sobretodo gozamos cos sorrisos e coas miradas dos nosos verdadeiros protagonistas: os bebés!

Bebés BbEncontros Ágora

O sábado 24 de Maio, tivo lugar a derradeira sesión do primeiro ano de programación dos BbEncontros. Por este motivo preparamos unha actividade especial mesturando a grandes e pequenos, coa finalidade de gozar xuntos a través dunha divertida historia ilustrada da man de Paula Bossio “O LAPIS”. O resultado: un lápis xigante, unha caixa de trastos e por suposto… un conto para clausurar un ano cheo de encontros!

Clausura BbEncontro

ESPERÁMOSVOS O VINDEIRO MES DE OUTUBRO con novas e creativas sorpresas!!

O mundo de Eric Carle

Unha noite, á luz da lúa chea, atopouse un ovo enriba dunha folla verde. Nada máis saír o sol… PLOP!!! do ovo saíu unha eiruga pequerrecha e moi larpeira…

Na Bbteca Ágora comezamos un novo ciclo! Deixamos atrás a Jo Lodge e ao seu Señor Coc para desfrutar con novas e emocionantes aventuras da man doutros recoñecidos autores e ilustradores da Literatura Infantil.

Dezanove bebés, acompañados das súas respectivas familias, percorreron moitos quilómetros cun único obxectivo: coñecer a Eric Carle e gozar coas súas personaxes!

Un oso pardo e unha eiruga moi larpeira foron os elementos motivadores elixidos para guiar a trama da sesión, creando unha simbiose de arte e natureza que tiveron como nexo de unión a lectura de imaxes.

Imaxes Sesión (2)

Recoñecemos, identificamos e imaxinamos

Imaxes SesiónCo obxectivo de estimular a atención dos bebés, plantexamos un xogo rítmico de luces e sombras. Sinxelas ilustracións, nas que predominaron os fondos brancos, servíronnos para que os bebés e as súas familias recoñeceran, identificaran e imaxinaran ser cada un dos animais que Eric Carle ilustrou no seu conto Oso pardo, oso pardo … que ves?Imaxes Sesión (1)

Ao ritmo de Dave Brubeck e da banda británica The Cure, fixemos un percorrido polos días da semana e degustamos xunto a unha pequena eiruga, un amplo surtido de froitas e outros manxares larpeiros! A nosa finalidade? ter un primeiro achegamento ao ciclo vital dunha eiruga: dende que sae do ovo ata que se converte nunha fermosa bolboreta.

 … construiu unha casiña ao seu redor e ficou dentro máis de dúas semanas. Un día mordeu a súa casiña e saíu voando… convertérase nunha FERMOSA BOLBORETA!!

Fotos

Pinchade nesta foto se queredes saber máis de Eric Carle

Estas e outras imaxes podedes consultalas no Flickr das Bibliotecas Municipais!

Esperámosvos o vindeiro mes de Febreiro con novas e sorprendentes aventuras!!

E por iso aprendemos sempre!

“Tod@s nós sabemos algo, tod@s ignoramos algo, por iso aprendemos sempre” Paulo Freire

Crocodilo, crocodilo á túa granxa todos imos… Crocodilo, crocodilo imos imos polo río!!

Na Biblioteca Municipal Ágora seguimos a sumar e xa podemos dicir que damos por rematado o segundo BbEncontro!! Desta volta o noso fío condutor, o Señor Coc, consciente do coñecemento que os peques teñen do mundo animal e de que lles resulta moi motivador e atraente, tomou o mando do seu tractor para invitarnos a pasar o día na súa GRANXA. 

Esceas como a poza, a eira, a corte e o alpendre servíronnos como elementos de xogo, observación e experiencia nun corto pero concreto achegamento ao entorno natural. 

Durante máis de vinte minutos, bebés e familias descubriron xuntos o mundo da lectura, xogaron coa música, mergulláronse na maxia das palabras e descubriron, con moito interese, o mundo que lles rodea…

Lembrade que antes do próximo BbEncontro teredes a oportunidade de desfrutar dunha batería de OBRADOIROS  DE LECTURA PARA BEBÉS. As sesións, da man de Katarsis Educación e Teatro, traballarán o xogo como parte da experiencia lectora e ofrecerán unha actividade didáctica para iniciar aos máis pequenos no mundo da lectura guiados polas súas familias, sen faltar por suposto, unha dinamización cun conto como protagonista.

 

Sinxelas ideas de Xogo Sensorial

As Bibliotecas Municipais cremos na importancia que tanto a estimulación temperá como o xogo sensorial, teñen no desenvolvemento do bebé. Accións como observar un conto, escoitar unha melodia, ulir unha flor ou tocar o auga forman parte do proceso de aprendizaxe arredor do mundo que lles rodea.

Xogo Sensorial

Son moitas as familias primerizas que visitan as nosas Bbtecas solicitándonos xogos sensoriais para os seus bebés. Tendo en conta isto e aproveitando os recursos bibliográficos que temos nas nosas Bibliotecas, seleccionamos 7 propostas fantásticas para xogar cos peques de 0 a 24 meses.

Todas estas actividades teñen como obxectivo estimular os sentidos e axudar no desenvolvemento psicomotor do bebé. Os materiais que precisamos son “low cost”, cousas que temos na casa e que poderíamos empregar para desfrutar desta experiencia multisensorial!!

Seguide os pasos de Beba, a nosa mascota da Bbteca, e percorrede a seguinte presentación…

Animámosvos a que compartades connosco o resultado da vosa experiencia e que nos aportedes novas propostas!

%d bloggers like this: